Kur trumbeta e lirisë

Thirri arbrin në kushtrim

Safet bir’i Shqipërisë

Vrapoi malit për çlirim.

Safet Butka djal’petrit

Flamurtar mbi t’gjith’u-ngrit.

Mbi shkëmbenj edhe mbi gurë

Ku ngre çerdhen shqipja e re

Mbi një pushk’ mbi një Flamurë

Dha betim për Mëmëdhe.

Safet Butka djal’petrit

Flamurtar mbi t’gjith’u-ngrit.

Dha betim se do t’luftojë

Veç për Komb edhe liri

Gjer sa vendi të shpëtojë

Prej mizores robëri.

Safet Butka djal’petrit

Flamurtar mbi t’gjith’u-ngrit.

Gjithë kohët u-rrëfye

Shembëll-drite ideali

Për Atdhenë s’u-kursye

Gjak i deshi, gjak i fali.

Safet Butka djal’petrit

Flamurtar mbi t’gjith’u-ngrit.

Komb’i tër’ do t’a kujtojë

Bir-dëshmorin e lirisë

Dhe i riu do t’a pasojë

N’rrug’ të ‘tij të shqiptarisë.

Safet Butka djal’petrit

Flamurtar mbi t’gjith’u-ngrit.